काठमाडौं । मौसम पूर्वानुमान महाशाखाका अनुसार आइतबार (पुस २७) तराई भू–भागका केही स्थानमा मध्याह्नसम्म हुस्सु तथा कुहिरो रहने सम्भावना रहेको छ। बिहानको समयमा हुस्सुका कारण जनजीवन, सवारी आवागमन तथा हवाई उडानमा आंशिक असर पर्न सक्ने महाशाखाले जनाएको छ।
आज कोसी प्रदेशका उच्च पहाडी तथा हिमाली भू–भागमा आंशिकदेखि सामान्य बदली रहनेछ भने देशका बाँकी भू–भागमा मौसम मुख्यतया सफा रहने पूर्वानुमान गरिएको छ। यसले गर्दा पहाडी र हिमाली क्षेत्रका बासिन्दाले चिसोका बीच पनि तुलनात्मक रूपमा खुलेको मौसमको अनुभव गर्नेछन्।
त्यसैगरी, आज राति पनि तराईका थोरै स्थानमा हुस्सु लाग्ने सम्भावना रहेको छ। पहाडी तथा हिमाली भू–भागमा भने राति पनि मौसम सामान्यतया सफा रहने महाशाखाले जानकारी दिएको छ। मौसम परिवर्तनसँगै आवश्यक सतर्कता अपनाउन महाशाखाले सर्वसाधारणलाई आग्रह गरेको छ।
२७ पुस २०८२, आईतबार ०८:४१ मा प्रकाशित
