नुवाकोट, फागुन १०, २०८२ - नुवाकोटको राजनीतिक वृत्तमा उल्लेखनीय हलचल पैदा गर्दै वाइसियलका प्रभावशाली युवा नेता दिनेश अधिकारी (राजा) ले औपचारिक रूपमा नेपाल कम्युनिष्ट पार्टी (एमाले) मा प्रवेश गर्नुभएको छ। प्रवेशसँगै उहाँलाई पार्टीको नुवाकोट जिल्ला कमिटी सदस्यमा मनोनित गरिएको छ, जसलाई राजनीतिक रूपमा महत्वपूर्ण रणनीतिक निर्णयका रूपमा हेरिएको छ।
पार्टी स्रोतका अनुसार संगठन विस्तार, युवा परिचालन तथा आगामी निर्वाचनलाई केन्द्रमा राख्दै जिल्लामा पार्टीको पकड मजबुत बनाउने उद्देश्यले अधिकारीलाई जिम्मेवारी दिइएको हो। लामो समयदेखि युवामाझ सक्रिय रहँदै आएका अधिकारीको प्रवेशले नुवाकोटमा एमालेको सांगठनिक आधार थप सुदृढ हुने विश्वास गरिएको छ।
प्रवेश कार्यक्रममा आगामी फागुन २१ गते हुने निर्वाचनका उम्मेदवार बद्री मैनाली लगायत जिल्ला तथा प्रदेश तहका नेताहरूको उपस्थिति रहेको थियो। नेताहरूले अधिकारीसहित दर्जनौं युवाहरूलाई स्वागत गर्दै युवाशक्तिको संगठित सहभागिताले पार्टीलाई नयाँ उचाइमा पुर्याउने विश्वास व्यक्त गरे।
कार्यक्रममा बोल्दै अधिकारीले पार्टीको नीति, सिद्धान्त र विकासमुखी कार्यक्रमप्रति पूर्ण प्रतिबद्धता जनाउँदै जनताको अधिकार, समृद्धि र स्थायित्वका पक्षमा दृढतापूर्वक काम गर्ने अठोट व्यक्त गर्नुभयो।
राजनीतिक विश्लेषकहरूका अनुसार, युवा पंक्तिमा प्रभाव राख्ने अधिकारीको एमाले प्रवेशले नुवाकोटको शक्ति सन्तुलनमा अर्थपूर्ण परिवर्तन ल्याउन सक्ने संकेत दिएको छ। आगामी निर्वाचनको पूर्वसन्ध्यामा भएको यो कदमलाई रणनीतिक र दूरगामी प्रभाव पार्ने निर्णयका रूपमा मूल्यांकन गरिएको छ।
