‘अपरेसन एब्सोल्युट रिजोल्भ’ नाम दिइएको उक्त कारबाहीका लागि अमेरिकी सेनाले महिनौँअघिदेखि तयारी गरेको थियो। संयुक्त चीफ अफ स्टाफका अध्यक्ष जनरल ड्यान केनका अनुसार पश्चिमी गोलार्धका २० वटा सैन्य बेसबाट १५० भन्दा बढी विमान परिचालन गरिएको थियो भने सीआईएले गत अगस्टदेखि नै मादुरोको गतिविधिमाथि निरन्तर निगरानी गर्दै आएको थियो।
अमेरिकी सेनाको डेल्टा फोर्सले मादुरोको कडा सुरक्षा घेराभित्र रहेको आवासको ठ्याक्कै नक्कल (रेप्लिका) निर्माण गरी पटक–पटक अभ्यास गरेको थियो। उक्त सुरक्षित भवनमा स्टिलका सुरक्षा ढोका र आपतकालीन ‘प्यानिक रुम’ समेत रहेको जनाइएको छ। सीआईएको सानो गोप्य टोली अगस्टमै भेनेजुएलामा प्रवेश गरी मादुरो कहाँ सुत्छन्, के खान्छन्, के लगाउँछन्, यहाँसम्म कि उनका पाल्तु जनावरबारेसमेत विस्तृत सूचना संकलन गरेको जनरल केनले खुलासा गरे।
अमेरिकी राष्ट्रपति डोनाल्ड ट्रम्पले मौसम अनुकूल नहुँदा चार दिनसम्म अपरेसन स्थगित गरेका थिए। अन्ततः शुक्रबार राति १०ः४६ बजे (ईएसटी) उनले कारबाहीको अन्तिम स्वीकृति दिएका थिए। ट्रम्पले फ्लोरिडास्थित मार–ए–लागोबाट प्रत्यक्ष रूपमा अपरेसन हेरिरहेको र त्यो “टेलिभिजन कार्यक्रम हेरेजस्तै” लागेको बताएका छन्।
शनिबार बिहानै सुरु भएको कारबाहीमा कराकास आसपासका भेनेजुएली हवाई सुरक्षा प्रणाली र सैन्य संरचनामाथि आक्रमण गरियो। साथै साइबर युद्धमार्फत राजधानीका ठूला क्षेत्रमा विद्युत् आपूर्ति बन्द गरिएको ट्रम्पले बताए, यद्यपि विधिबारे विस्तृत खुलासा गरिएन।
‘नाइट स्टल्कर्स’ भनेर चिनिने १६०औँ विशेष अपरेसन एभिएसन रेजिमेन्टका हेलिकोप्टरहरू क्यारिबियन सागर हुँदै न्यून उचाइमा उडेर भेनेजुएलाको आकाशमा प्रवेश गरेका थिए। अपरेसनमा एफ–१६, एफ–२२, एफ–३५ लडाकु विमान, बी–१ बमवर्षक, इलेक्ट्रोनिक युद्ध विमान र गुप्तचर विमानसमेत सहभागी थिए।
स्थानीय समयअनुसार बिहान १ः०१ बजे डेल्टा फोर्स मादुरोको आवासमा पुगेपछि गोली हानाहान भएको थियो। अमेरिकी सेनाले “अत्यधिक बल प्रयोग” गर्दै जवाफी कारबाही गरेको जनाइएको छ। एक हेलिकोप्टरमा क्षति पुगे पनि त्यो अन्तिमसम्म सञ्चालनमै रह्यो। ट्रम्पका अनुसार स्टिलका ढोका काट्न ‘विशाल ब्लोटर्च’ तयार राखिएको थियो, तर मादुरो सुरक्षित कोठामा पुग्नुअघि नै पक्राउ परेपछि त्यसको आवश्यकता परेन।
बिहान ३ः२९ बजे अमेरिकी फौज मादुरो र उनकी पत्नी सिलिया फ्लोरेसलाई नियन्त्रणमा लिँदै भेनेजुएलाको हवाई क्षेत्रबाट बाहिरियो। उद्धार र फिर्ती प्रक्रिया करिब २ घण्टा २८ मिनेटमा सम्पन्न भएको जनाइएको छ। उनीहरूलाई USS आइवो जिमा युद्धपोतमार्फत अमेरिकातर्फ लगिएको थियो।
ट्रम्पका अनुसार यस अपरेसनमा कुनै पनि अमेरिकी सैनिकको मृत्यु भएन, यद्यपि केही घाइते भएका छन्। भेनेजुएलाकी उपराष्ट्रपति डेल्सी रोड्रिगेजले भने नागरिक र सैनिकको ज्यान गएको दाबी गरेकी छन्।
मादुरो र फ्लोरेस शनिबार नै न्यूयोर्क पुर्याइएका छन्, जहाँ उनीहरूमाथि सन् २०२० मा दर्ता गरिएका संघीय ‘नार्को–आतंकवाद’ सम्बन्धी अभियोगमा मुद्दा चलाइनेछ।
२० पुस २०८२, आईतबार ०८:३२ मा प्रकाशित
