काठमाडौं - राष्ट्रिय स्वतन्त्र पार्टी (रास्वपा) का सभापति रवि लामिछानेले नयाँ वर्ष २०८३ साललाई नेपाली राजनीतिको ‘खिल निकाल्ने वर्ष’ को रूपमा व्याख्या गरेका छन्। सामाजिक सञ्जाल फेसबुकमार्फत आफ्नो धारणा सार्वजनिक गर्दै उनले आगामी वर्ष देशको राजनीतिक र सामाजिक संरचनामा गहिरो सुधारको आवश्यकता रहेको औंल्याएका हुन्।
सभापति लामिछानेले राजनीतिक शुद्धीकरण र परिवर्तनको प्रक्रिया सुरु गर्दा केही समय पीडादायी हुन सक्ने भन्दै सचेत गराएका छन्। ‘खिल निकाल्ने वर्ष हो, मज्जाले दुख्छ,’ उनले लेखेका छन्, ‘सहने शक्ति मिलोस्, हाम्रो तर्फबाट धेरै शुभकामना।’
उनको यस अभिव्यक्तिलाई राजनीतिक वृत्तमा लामो समयदेखि थिति नबसेको र भ्रष्टाचारले जकडिएको प्रणालीलाई भत्काएर नयाँ जग बसाल्ने सङ्कल्पका रूपमा अर्थ्याइएको छ। घाउमा गाडिएको खिल निकाल्दा जस्तै सुरुवाती चरणमा केही असहजता र जटिलता देखिए पनि दीर्घकालीन हितका लागि यो अपरिहार्य रहेको उनको बुझाइ छ।
रास्वपा सभापति लामिछानेले बारम्बार उठाउँदै आएका एजेन्डाहरू-सुशासन, पारदर्शिता र परम्परागत राजनीतिको विकल्प-लाई उनले यस वर्ष थप आक्रामक रूपमा अघि बढाउने संकेत गरेका छन्। उनको यो भनाइले रास्वपा आगामी दिनमा देशको समग्र राजनीतिक प्रणालीभित्रका ‘विकृति’ हरूलाई निर्मूल पार्ने योजनामा केन्द्रित रहेको स्पष्ट पारेको छ।
सामाजिक सञ्जालमा उनको यो सन्देशले शुभेच्छुक र आम नागरिकमाझ ठूलो चासो र बहस सिर्जना गरेको छ। आम जनतालाई परिवर्तनको यो कष्टकर यात्रामा साथ दिन आह्वान गर्दै उनले धैर्यता र दृढताको कामना गरेका छन्।
