रविन्द्र कट्टेल - नागरिक मैत्री प्रहरी सेवा प्रदान गर्ने दृढ उद्देश्यसहित काठमाडौँ महानगरका मुख्य सहरी क्षेत्र असन र परोपकारमा अवस्थित प्रहरी बिटको पूर्ण पुनर्निर्माण सम्पन्न भई औपचारिक रूपमा हस्तान्तरण गरिएको छ। उक्त अवसरमा काठमाडौँ उपत्यका प्रहरी कार्यालयका एसएसपी रमेश थापाको प्रमुख आतिथ्यमा उद्घाटन कार्यक्रम सम्पन्न भएको हो। दैनिक रूपमा हजारौँ नागरिकको आवतजावत हुने संवेदनशील क्षेत्रलाई केन्द्रमा राखेर गरिएको यो पुनर्निर्माणले प्रहरी-नागरिक सम्बन्धलाई अझ सुदृढ बनाउने विश्वास लिइएको छ।
एसएसपी रमेश थापाको पहल, दूरदृष्टि र सक्रिय नेतृत्वमा काठमाडौँका विभिन्न स्थानमा प्रहरी बिटहरू धमाधम पुनर्निर्माण भइरहेका छन्। जीर्ण भौतिक संरचनामा सीमित भएर काम गर्न बाध्य प्रहरी कर्मचारीलाई अब सुरक्षित, व्यवस्थित र सम्मानजनक कार्य-आवासीय वातावरण प्राप्त भएको छ। यसले सेवाग्राही नागरिकप्रति प्रहरीको व्यवहार, सेवा प्रवाहको गति र प्रभावकारितामा प्रत्यक्ष सकारात्मक असर पार्ने अपेक्षा गरिएको छ।
विशेषतः जेन-जी आन्दोलनपछि काठमाडौँको शान्ति-सुरक्षामा देखिएका चुनौतीहरूलाई सूक्ष्म रूपमा विश्लेषण गर्दै एसएसपी थापाले अपनाएको रणनीति उल्लेखनीय छ। संवाद, संयम र संवेदनशील सुरक्षाको अवधारणालाई प्राथमिकतामा राख्दै उनले दमन होइन, समाधानमुखी प्रहरी कार्यशैलीलाई अघि बढाएका छन्। परिणामस्वरूप, आन्दोलनपछिको संक्रमणकालमा समेत काठमाडौँमा शान्ति, सुव्यवस्था र नागरिकको दैनिक जीवन सामान्य राख्न नेपाल प्रहरी सफल भएको छ।
प्रहरी बिट पुनर्निर्माण केवल भौतिक संरचनाको विकास मात्र होइन; यो प्रहरीको मनोबल, पेशागत गरिमा र नागरिकप्रतिको प्रतिबद्धताको प्रतीक हो। कार्यस्थलमै प्रहरी कर्मचारी बस्न सक्ने, छिटो प्रतिक्रिया दिन सक्ने र समुदायसँग नजिकबाट काम गर्न सक्ने वातावरण बनेपछि प्रहरीको आत्मविश्वास स्वाभाविक रूपमा बढेको छ। यही मनोबलले अपराध नियन्त्रण, ट्राफिक व्यवस्थापन र आकस्मिक अवस्थाको सम्हालाइमा थप प्रभावकारिता ल्याउनेछ।
एसएसपी रमेश थापा कठोर अनुशासन र मानवीय संवेदनशीलताको सन्तुलित नेतृत्वका रूपमा परिचित हुँदै आएका छन्। उनको कार्यशैलीले नेपाल प्रहरीभित्र “सेवा, सुरक्षा र विश्वास” भन्ने मूल मन्त्रलाई पुनर्जीवित गरेको छ। नागरिकमैत्री प्रहरी सेवाको अभ्यासलाई नारा होइन, व्यवहारमा उतार्दै उनले काठमाडौँको शान्ति-सुरक्षाको प्रत्याभूति दिलाउन महत्वपूर्ण भूमिका निर्वाह गरेका छन्।
असन र परोपकार प्रहरी बिटको पुनर्निर्माण तथा उद्घाटन कार्यक्रमले नेपाल प्रहरी जनताको साथमा छ, जनताकै सुरक्षाका लागि छ भन्ने सन्देश बलियो रूपमा प्रवाह गरेको छ। एसएसपी रमेश थापाको नेतृत्वप्रति उच्च सम्मान र मूल्याङ्कन गर्दै भन्न सकिन्छ-आजको काठमाडौँ सुरक्षित छ भने, त्यसको पछाडि उनको दूरदर्शी सोच, सक्रियता र जिम्मेवार नेतृत्वको ठूलो योगदान छ।
