काठमाडौं । सुर्खेतकी इनिशा विकको बलात्कारपछि हत्या भएको घटनाले देशभर आक्रोश बढिरहेका बेला शुक्रबार राजधानी काठमाडौंमा विद्यार्थीहरू सडकमा उत्रिएका छन्। इनिशा विकलाई न्याय दिलाउनुपर्ने मागसहित Padma Kanya Multiple Campus को स्वतन्त्र विद्यार्थी युनियनको अगुवाइमा बागबजारदेखि माइतीघरसम्म सशक्त विरोध प्रदर्शन गरिएको हो।
कालो पट्टी बाँधेर प्रदर्शनमा उत्रिएका विद्यार्थीहरूले ‘नारीहरूको सुरक्षा सुनिश्चित गर’, ‘दोषीलाई तुरुन्त पक्राउ गर’, ‘निष्पक्ष छानबिन गर’, ‘बलात्कार-हत्या विरुद्ध कठोर कानुन बनाऊ’ जस्ता नारा लगाउँदै सरकारको ध्यानाकर्षण गराएका थिए। प्रदर्शनकारीहरूले महिलामाथि भइरहेका यस्ता जघन्य अपराधमा राज्यको कानुनी कमजोरी र कार्यान्वयनको सुस्तताले अपराधीको मनोबल बढेको आरोप लगाए।
विद्यार्थी नेताहरूले पीडित परिवारले वास्तविक न्याय नपाएसम्म आन्दोलन नरोकिने स्पष्ट चेतावनी दिएका छन्। उनीहरूको भनाइमा, केवल घटनापछि शोक व्यक्त गर्नु पर्याप्त नभई आगामी सरकारले बलात्कार, हत्या तथा महिला हिंसाका घटनामा द्रुत सुनुवाइ, कठोर सजाय र पीडित परिवारलाई राज्यस्तरीय सुरक्षा दिने विशेष कानुन तत्काल ल्याउनुपर्ने समय आएको छ।
Birendranagar स्थित सामुदायिक वन क्षेत्रमा इनिशा विक मृत अवस्थामा भेटिएकी थिइन्। पोस्टमार्टम रिपोर्टअनुसार बलात्कारपछि अत्यधिक रक्तस्रावका कारण उनको मृत्यु भएको पुष्टि भएको छ। घटनाले समाजमा गम्भीर सुरक्षा प्रश्न उठाएको छ भने सर्वसाधारणले दोषीमाथि उदाहरणीय कारबाहीको माग तीव्र बनाएका छन्।
प्रहरीले घटनाको अनुसन्धान जारी रहेको जनाएको भए पनि प्रदर्शनकारीहरूले अनुसन्धान मात्र होइन, परिणाममुखी न्याय चाहिएको बताएका छन्। उनीहरूको जोड छ- अब आउने सरकारले महिलामाथि हुने अपराधलाई राष्ट्रिय आपतकालीन प्राथमिकताको विषय मानेर कठोर कानुनी सुधार, छिटो फैसला र अपराधीलाई कुनै पनि हालतमा छुट नदिने नीति लागू गर्नुपर्छ।
